Im Schorsch si Jooresbricht

Sehr verehrti Awäsendi

als erschts möcht ich mii für d Ylaadig als Gascht vom

Pilzverrein Lamälle und Store ….. eeee Lamälle und Spore vo Dornach Tierstai …. ganz härzlig bedangge.

My Name isch Heiri Pfifferlig und ich bi uff Wunsch vo euerem Vorstand yglaade worde.

Mit däre Ylaadig möchte me e Verglych mache wye anderi Pilzverein schaffe und wirke.

Mir hän euere Wunsch begriffe well ihr sinn im hindere Laufetal scho e bitz absyts vom e pulsierende Verreinsläbe.

Mir hänis d Mieh gmacht und gstudiert wye me am beschte e sone Verglych könnti mache und sinn druff ko… Uffpasse ….mir mache e Verglych vom Jooresbricht 2016

do aber das Joor noonig ganz umme isch handlets sich nur um e Ussschnitt , wo aber als Verglych verglychbar isch.

Ich wär barat :

aaa vylicht no e Detail , mir dyen unseri Jooresbricht immer in Gedichtform vorläse , und das möcht ich au bi ihne so mache.

So …… und jetz fang ich a ….

Jooresbricht vom Pilzverein Lamälle + Spore 2016

Me het mr gsait es dät nit schaade

ich sygy hüt als Gascht y glaade

zum Verglych , kasch zwar nüt kaufe

mit em Pilzverein vo Laufe

Apropo:

Sollte meine Mundart öbber stören

ich könnte auch in Schriftdeutsch schnören

kaini Ywänd , also guet …….

ich leit dye Technischi Kommision

sy ghöre das dängg scho am Ton

und ganz typisch jeede Maa

fang immer mittem Wätter a

dr Friehlig , vo mir uss ischer z warm

drumm ischer au an Pilz so arm

zwar z Dornach uff dr Burg e lai

hets Ritter ka am erschte Mai

dr Summer aber dä isch z trogge

das erkennt me an de Sogge

wo d Waldameise trage

so dyen das d Wätterfrösch als sage

guet ich ha das e soo nie gsee

ich dues das dellgell übernee

doch jetz nomoll zum Friehlig zrugg

do gsee ich z Dornach vo dr Brugg

uss so e ganz e winzigs Ding

s isch glaub e Morchelbächerling

dämm sy Gschmagg dä herrscht so vor

nach altem Hallebad und Chlor

no gits no ain dä het pressant

dä segglet bständig ummenand

und jetz my Froog wye heisst das Ding……

dä heisst Voreiliger Ackerling

Denn nach em Friehlig kunnt dr Summer

dä bereitet uns nur Kummer

denn dä Kaib dä isch so trogge

statt Hafer waggse Haferflogge

Pilz gits fascht keini au kai Gmiess

und wenns Pilz git no hän sy d Fiess

doch mit Trumpete Paucke Fyydel

verkaufe Migro Konsi Lyydel

Staipilz Trüffel Eierschwümm

vo wo sy kömme weiss ich nümm

und denn das weenige wo me zahlt

für dye schöne Pilz ganz früsch verstraalt

Entschuldigung jetz schweif ich ab

jä guet ich ärgere my halt drab

Doch jetz zum Friehlig …jetz fang ich a

ich glaub dä hämmer noonig ka

ich suech das Blatt wo druff stoot…. Wetter ( sueche

ha ich e Gnuusch hüt mit de Bletter

Aaaa Friehlig gsee ich…. do bi ich duure

ich sett mee dängge anstatt schnuure

Gut do hämmer das vom Summer

und wye scho gsait mit dämm hesch Kummer

statt Schlyymig isch dr Schlyymkopf trogge

und alli Kuhmuul trage Glogge

und au d Röhrling sygs dä und sälle

griege statt Röhre jetz Lamälle

Knoblauchschwindling jetz dye ruuche

kasch als reine Knoblauch bruuche

dr Parasol muesch unde stutze

no kaschen als Sunneschirm benutze

und wenn d Raizger mit de Reize logge

denn isch dr Bode wirklig trogge

denn ghört me als hoch vo de Grete

e Tode-Ton vo de Trumpete

und au dr Moorekopf kasch dängge

lost sy schwarze Kopf lo hänge

drumm freut sich alles Frau und Maa

uff e schöne Herbscht ……. hurra

und ischer do goot me in Wald

zum troggene aane ischs no kalt

und für e Füür hesch nüt dr by

do sait my Frau : no losses sy

zwar statt Zündhölzli könntsch persee

e moll jo Schwäfelköpfli nee

mir hän denn gsuecht bis zoobe spoot

was vor em Kontrollör denn stoot

3 Galleröhrling , Satansknolle

und e digge Häxebolle

e spitzbugglige Schleyerling

vom Fliegepilz e Häxering

denn no e griene Knollebletter

das ganze landet klar… im Schretter

Das wär my Bricht gsi nur bis hütte

jetz warte-mr bisses kunnt go schütte

denn schwärme mir wiider uss in Wald

es het my gfeut…… Adiö bis bald

13. Dezember 2016 / Georges Klauser